Lebap welaýatynyň Taryhy we ülkäni öwreniş muzeýiniň gurnamagynda «Nowruz-ösüşiň we gözelligiň nagmasy» atly serginiň açylyşy geçirildi.

     «Halkara parahatçylyk we ynanyşmak ýylymyzda» mukaddes Bitaraplygymyzyň şanly 30 ýyllyk toýunyň toýlanýan ýylynda Milli bahar baýramy–Halkara Nowruz güni mynasybetli geçirilýän dabaraly çäreler gadymy Lebap topragyny toý lybasyna besledi. Arkadagly Gahryman Serdarymyzyň: «Goý, Nowruz owazlary agzybirligiň, parahatçylygyň we gözelligiň mukamyna öwrülip, joşgunly kalplara ylham eçilsin!» diýen ajaýyp sözlerinden ruhlanyp, ülkämizde bellenilýän Milli bahar baýramy halkara Nowruz güni mynasybetli Türkmenistanyň Magtymguly adyndaky Ýaşlar guramasynyň Lebap welaýat, Saýat etrap Geňeşleriniň Lebap welaýatynyň Taryhy we ülkäni öwreniş muzeýiniň gurnamagynda «Nowruz-ösüşiň we gözelligiň nagmasy» atly sergi açylyşy geçirildi.

     Serginiň dowamynda muzeý gymmatlyklaryndan düzülen sergi ýaýbaňlandyryldy.Muzeý gymmatlyklarymyzdan düzülen sergä bagtyýar talyp ýaşlar, bilim işgärleri, jemgyýetçilik guramalaryň wekilleri uly buýsanç bilen tomaşa etdiler. Giňden ýaýbaňlandyrylan sergide zenanlarymyzyň, ene-mamalarymyzyň on barmagyndan döräp, sungat derejesine ýeten haly we haly önümlerimiz, dokma hem-de amaly-haşam sungatymyz, zähmet gurallary, Nowruz baýramynyň dabarasyny şöhlelendirýän sungat eserleri öz beýanyny tapdy. Sergä tomaşa eden her bir ynsanda halkymyzyň milli mirasyna medeniýetine hem-de sungatyna buýsanç duýgusyny döretmekde uly ähmiýetli boldy. Nowruz baýramy parahatçylyk, ynsanperwerlik, dost-doganlyk ýörelgelerini giňden dabaralandyrýan baýramdyr, ösüşiň we gözelligiň buşlukçysydyr.

     Biz ýaşlara okamaga, döredijilikli zähmet çekmäge, muzeý gymmatlyklaryny, halkymyzyň, ýaşlarymyzyň arasynda wagyz etmäge ähli mümkinçilikleri, şertleri döredip berýän türkmen halkynyň Milli Lideri Gahryman Arkadagymyza, Arkadagly Gahryman Serdarymyza köp sagbolsun aýdýarys. Goý Gahryman Arkadagymyzyň, Arkadagly Gahryman Serdarymyzyň janlary sag, belent başlary aman bolsun, tutýan tutumly işleri uly üstünliklere beslensin!

Rahman Ergeşow

Türkmenistanyň Magtymguly adyndaky

Ýaşlar guramasynyň Lebap welaýat

Geňeşiniň başlygynyň orunbasary

Köp okalanlar