Ýakynda Lebap welaýatynyň Seýitnazar Seýdi adyndaky Türkmen Döwlet mugallymçylyk institutynyň uly mejlisler jaýynda Ylymlar güni mynasybetli ylmy-amaly maslahat geçirildi.

     Berkarar döwletimiziň täze eýýamynyň Galkynyşy döwründe Hormatly Prezidentimiziň alyp barýan içeri we daşary syýasatlaryndan ugur alyp bilim edaralaryny döwrüň talaplaryna we häzirki zaman ülňülerine laýyk derejede kämilleşdirmek, täze sapaklary, aýratyn-da, sanly ulgam bilen baglanyşykly sapaklary girizmek maksady bilen ýakynda Lebap welaýatynyň Seýitnazar Seýdi adyndaky Türkmen Döwlet mugallymçylyk institutynyň uly mejlisler jaýynda Türkmenistanyň Magtymguly adyndaky Ýaşlar guramasynyň Lebap welaýatynyň Türkmenabat şäher Geňeşi hem-de Seýitnazar Seýdi adyndaky Türkmen Döwlet mugallymçylyk instituty bilen bilelikde guramagynda talyp ýaşlaryň gatnaşmagynda Ylymlar güni mynasybetli ylmy-amaly maslahat geçirildi.

     Maslahadyň dowamynda çykyş edenler milli bilim ulgamyňyzy yzgiderli kämilleşdirilmegine döwlet tarapyndan aýratyn üns berilmegi ýaş nesliň diňe bir bilim derejesiniň däl, eýsem olaryň edep-terbiýesine, zähmet endiklerine hem oňaýly täsir edýär. Bilşimiz ýaly, ylym-bilim adamy zähmete we durmuşa ruhlandyrýar. Bilimli, okuwly adamyň düşünjesi, dünýägaraýşy giň bolýar. Bilim ulgamynyň dürli basgançaklarynda bilim terbiýeçilik işlerini alyp barmak babatda usuly täzelikler, dünýä ylmynyň gazananlary durmuşa ornaşdyrylýar. Bagtyýarlyk döwrüniň ösen şahsyýetini kemala getirmekde bilim terbiýeçilik işleri türkmen halkynyň ahlak ýol-ýörelgelerine, milli däp-dessurlaryna, şeýle hem halk mugallymçylyk taglymatlaryna esaslandyrylýandygy dogrusynda giňişleýin gürrüň etdiler.

     Maslahatyň ahyrynda çykyş edenler ýaşlara okamaga, işlemäge, ýaşamaga ähli mümkinçilikleri döredip beren, Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, alyp barýan döwlet ähmiýetli işleriniň rowaçlyklara beslenmegini arzuw etdiler.

Begenç ÇARYÝEW,

Türkmenistanyň Magtymguly adyndaky

Ýaşlar Guramasynyň Lebap welaýatynyň

Türkmenabat şäher Geňeşiniň Guramaçylyk

bölüminiň esasy hünärmeni.

Köp okalanlar