«Ýaňlan, Diýarym!» telebäsleşiginiň Lebap welaýaty boýunça ýeňijileri yglan edildi

Türkmenistanyň Prezidentiniň yglan eden «Türkmeniň Altyn asyry» atly bäsleşiginiň çäklerinde «Ýaňlan, Diýarym!» telebäsleşiginiň Lebap welaýat tapgyry geçirildi.

Türkmenabat şäheriniň «Türkmeniň Ak öýi» binasynyň öňündäki meýdançada geçirilen bu bäsleşige deslapky tapgyrlarda ýeňiji bolan aýdymçylaryň 10-sy gatnaşdy diýip, "Türkmenistan: Altyn asyr" elektron neşiri habar berýär. «Ýaňlan, Diýarym!» telebäsleşiginiň düzgünnamasyna laýyklykda ýurdumyzyň tanymal sungat ussatlaryndan ybarat eminler topary tarapyndan höwesjeň ýaş zehinleriň sahnada özlerini alyp baryş medeniýetine, aýdym aýdyş ussatlygyna, ýerine ýetiriliş aýratynlyklaryna, aýdymlaryň mazmun derejesine uly üns berildi. Eminler toparynyň çykaran netijesi boýunça ýaş zehinli aýdymçylaryň 2-si –Türkmenistanyň Döwlet çeperçilik akademiýasynyň talyby, Hojambaz etrabynyň Hojambaz şäheriniň ýaşaýjysy Serdar Jumaýew hem-de Halaç etrabyndan Saparmyrat Tekäýew telebäsleşigiň welaýat tapgyrynyň ýeňijileri diýlip yglan edildi hem-de olar «Ýaňlan, Diýarym!» telebäsleşiginiň döwlet derejesinde geçiriljek jemleýji tapgyryna gatnaşmaga hukuk gazandylar.

Köp okalanlar