ÝAŞ ÝANGYN SÖNDÜRIJILER

Sagdynlygyň we ruhubelentligiň ýurdy diýlip ykrar edilen döwletimizde ýaşlary sporta köpçülikleýin çekmek maksady bilen giň gerimli çäreler, sport ýaryşlary yzygiderli dowam edýär. Golaýda şeýle çäreleriň biri Türkmenabat şäherindäki 14-nji sport mekdebinde hem guradyk. Türkmenistanyň Magtymguly adyndaky Ýaşlar guramasynyň Lebap welaýat Geňeşi, Lebap welaýat Polisiýa müdirliginiň Ýangyn howpsuzlygy bölümi, Baş bilim müdirligi, Saglygy goraýyş müdirligi, Türkmenistanyň Kärdeşler arkalaşyklarynyň Lebap welaýat bölümi, Medeniýet müdirligi, Türkmenistanyň Gyzyl Ýarymaý milli jemgyýetiniň Lebap welaýat bölümi, Bedenterbiýe we Sport baradaky baş müdirligi, Türkmenistanyň Ýangyna Garşy meýletin jemgyýetiniň Türkmenabat şäher şahamçasy bilelikde guramagynda welaýatyň umumybilim berýän orta mekdepleriniň okuwçylarynyň ýaş ýangyn söndüriji toparlarynyň arasynda geçirilen ýangyn-amaly sport bäsleşigi hem şeýle ähmiýetli çäreleriň birine öwrüldi. Bäsleşigiň maksady Türkmenistanyň Prezidentiniň ösüp gelýän ýaş nesliň döwrebap bilim almaklary, berk bedenli, sagdyn, geljekde durmuşa taýýar, düşünjeli ýaşlar bolup ýetişmekleri baradaky talaplaryny durmuşa geçirmekden, mekdep okuwçylarynyň ýangyn howpsuzlyk düzgünleri baradaky bilimlerini kämilleşdirmekden hem-de olaryň ýangyn howpuna garşy bolan raýatlyk borçlaryna düşünjesini artdyrmakdan ybarat bolup durýar. Mekdep okuwçylary ýaryşyň dowamynda 100 metrlik päsgelçilikli aralygy geçmek, 4*100 metrlik ýangyn estafetasy boýunça bäsleşdiler. Bäsleşikde I orna Dänew etrabynyň 18-nji orta mekdebiniň okuwçysy Abdyrahmanow Azat, II orna Saýat etrabynyň 31-nji orta mekdebiniň okuwçysy Gylyjow Baýram, III orna Çärjew etrabynyň 45–nji orta mekdebiniň okuwçysy Rustamow Meňli dagylar mynasyp boldular. Bäsleşigiň ahyrynda ýeňiji bolan okuwçylara Türkmenistanyň Magtymguly adyndaky Ýaşlar guramasynyň Lebap welaýat Geňeşi tarapyndan ýadygärlik sowgatlar gowşuryldy.

TMÝG-niň Lebap welaýat Geňeşiniň esasy hünärmeni: Owadan BABAGULYÝEWA

Köp okalanlar