Dänewde hünär bäsleşigi geçirildi

Dänew etrabyndaky «Leýli» toý dabaralary merkezinde Türkmenistanyň Zenanlar birleşikleriniň Merkezi Geňeşi we Türkmenistanyň Kärdeşler arkalaşyklarynyň Milli merkezi tarapyndan yglan edilen «Hünärim bar ― hormatym bar» atly bäsleşigiň etrap tapgyry geçirildi. Oňa edara-kärhanalarda zähmet çekýän gelin-gyzlar gatnaşyp, özleriniň ukyp başarnyklaryny görkezdiler.

Bäsleşik dört şertden ybarat boldy. Birinji şertde oňa gatnaşyjylar özleri hem-de işleýän ýeri bilen tanyşdyrlar. Ikinji şertde ezber elli tikinçi gelin-gyzlar 6-7 ýaşly gyzjagazlara 30 minudyň dowamynda köýnek biçip, tikip, egnine geýdirdiler. Üçünji şertde bolsa bäsdeşler Gahryman Arkadagymyzyň mähriban käbesi Ogulabat ejemiziň hünär ýolundan ugur alyp, alajalary taýýarlap, olardan durmuşa çykjak gyzyň toý bukjasyny bejerdiler. Bäsleşigiň soňky dördünji şertinde gelin-gyzlar özleriniň sünnäläp, bejeren keşdeli lybaslaryny geýip görkezdiler. Bu şertde bäsdeşler milli lybasyndaky el-işiniň nagyşlaryny we olaryň döreýşini giňişleýin gürrüň berdiler.

Gyzykly geçen bäsleşigiň netijesinde onuň ýeňijileri yglan edildi. Etrap medeniýet merkeziniň işgärleri Maksat Ibragimowa bilen Dürjan Öwlüýägulyýewa bäsleşigiň etrap tapgyrynyň ýeňijileri boldular. Olar indi welaýat tapgyrynda bäsleşerler.

Köp okalanlar