Türkmenistanda 1 — 7-nji aprelde Bütindünýä saglyk gününe bagyşlanan çäreler geçiriler

1 — 7-nji aprel aralygynda Türkmenistanda Bütindünýä saglyk gününe gabatlanyp, sport, medeni we wagyz-nesihat çäreleri geçiriler. Olara görülýän taýýarlyk işleri 20-nji martda sanly ulgam arkaly geçirilen Ministrler Kabinetiniň mejlisinde maslahatlaşyldy diýip, «Watan» habarlar gepleşiginde mälim edildi.

Wise-premýer B.Mämmedow bedenterbiýäni ösdürmäge we sagdyn durmuş ýörelgesini wagyz etmäge gönükdirilen çäreleri geçirmek boýunça alnyp barylýan taýýarlyk barada hasabat berdi.

Habar berlişi ýaly, ýurtda köpçülikleýin welosipedli ýörişleri, sport ýaryşlaryny we beýleki çäreleri guramak meýilleşdirilýär. Olar welaýatlary, şeýle hem Aşgabat we Arkadag şäherlerini öz içine alar. Bu çärelere mekdep okuwçylary, talyplar, edara-kärhanalaryň işgärleri we türgenler gatnaşar.

Mundan başga-da, ylmy-amaly maslahatlary, wagyz-nesihat we medeni çäreleri geçirmek göz öňünde tutulýar.

Prezident Serdar Berdimuhamedow hasabaty diňläp, Bütindünýä saglyk gününiň sporty wagyz etmekde we ilatyň saglygyny berkitmekde uly ähmiýetiniň bardygyny belledi.Döwlet Baştutany meýilleşdirilen çäreleriň ýokary hilli taýýarlanmagyny we ýokary derejede geçirilmegini üpjün etmegi tabşyrdy.

Köp okalanlar